Cyllid Myfyrwyr

Darperir cyllid i fyfyrwyr o Gymru sy’n mynd i sefydliad addysg uwch yn y DU, neu mewn rhai achosion, myfyrwyr sy’n astudio yng Nghymru, drwy Gyllid Myfyrwyr Cymru ar ran Llywodraeth Cymru.

Gallwch wneud cais am grantiau a benthyciadau i’ch helpu gyda’ch costau byw a benthyciad ymlaen llaw i dalu’ch ffioedd dysgu.

Sut Mae’n Gweithio

  1. Ar ôl i chi wneud cais i’r brifysgol drwy UCAS, gallwch wedyn wneud cais ar-lein am eich cyllid myfyrwyr yn Hafan | Cyllid Myfyrwyr Cymru
  2. Efallai y bydd yn rhaid i chi ddarparu tystiolaeth o incwm eich cartref. Gallwch ddefnyddio’r gyfrifiannell Cyllid Myfyrwyr ar wefan y llywodraeth i gael amcangyfrif.
  3. Ar ôl i’ch cais gael ei gymeradwyo a’ch bod wedi derbyn cynnig gan brifysgol, bydd cyllid myfyrwyr yn talu eich benthyciad ffioedd dysgu yn uniongyrchol i’r brifysgol ar eich rhan. Yna, bydd unrhyw daliadau benthyciad cynhaliaeth yn cael eu talu i chi mewn tri rhandaliad yn ystod y flwyddyn academaidd – Medi, Ionawr ac Ebrill.

Ar Ôl Y Brifysgol

Ar ôl i chi orffen yn y brifysgol, gall yr elfen ad-dalu swnio ychydig yn gymhleth, ond rydyn ni yma i helpu. Mae’r cyfan yn dibynnu ar faint rydych chi’n ei ennill, ac nid faint rydych chi wedi’i fenthyg.

Ar hyn o bryd, fyddwch chi ddim yn talu unrhyw beth yn ôl nes byddwch yn ennill £26,575 fel cyflog blynyddol. Byddwch yn talu 9% yn ôl os byddwch yn ennill unrhyw beth dros y swm hwn. Os bydd eich enillion yn gostwng o dan £26,575, bydd yr ad-daliadau’n dod i ben.

Os byddwch yn ennill digon i ddechrau ad-dalu eich benthyciad myfyriwr, bydd y swm yn cael ei ddidynnu o’ch cyflog misol yn awtomatig. Does dim byd y mae angen i chi ei wneud i drefnu hyn.

Ar hyn o bryd, ar ôl 30 mlynedd, mae unrhyw ddyled sydd heb ei thalu yn cael ei dileu ac ni fydd byth yn cael ei throsglwyddo i unrhyw un arall.

Edrychwch ar Save the Student i gael rhagor o wybodaeth fanwl am ad-dalu eich benthyciadau.